កីឡាករសញ្ជាតិជប៉ុនលេងនៅកម្ពុជាមុនគេ តាំងពីឆ្នាំ២០១១ Ota ផ្លាស់ទៅលេងលីគកំពូលតៃវ៉ាន់

កីឡាករលេងក្នុងតំណែងខ្សែបម្រើ Takahito Ota ដែលមានសញ្ជាតិជប៉ុន ធ្លាប់ប្រឡូកក្នុងវិស័យបាល់ទាត់កម្ពុជារាប់ឆ្នាំ ពេលនេះបានប្រកាសផ្លាស់ទៅលេងនៅលីគកំពូលតៃវ៉ាន់។

ក្រោយចំណាយពេលនៅប្រទេសកម្ពុជាជិត១០ឆ្នាំ កីឡាករខាងលើបានប្រកាសជាផ្លូវការនៅក្នុងគណនីបណ្តាញសង្គមរបស់គាត់ថា នឹងចាកចេញពីប្រទេសយើងទៅចូលរួមក្លឹប Taipei Red Lions ដែលជាសមាជិកនៃលីគកំពូលតៃវ៉ាន់។

បញ្ជាក់ផងថា កីឡាករខាងគឺជាកីឡាករសញ្ជាតិជប៉ុន ឈានជើងមកប្រឡូកក្នុងវិស័យបាល់ទាត់កម្ពុជាមុនគេបង្អស់ ពោលគឺតាំងពីជើងទី២ នៃរដូវកាល២០១១ ដែលឆ្នាំនោះដដែលលោកក៏បានរួមចំណែកជួយឲ្យ ក្លឹបភ្នំពេញក្រោន គ្រងជើងឯកលីគកំពូលកម្ពុជាផងដែរ។

ចាប់តាំងពីគ្រានោះទល់បច្ចុប្បន្ន Takahito Ota បានធ្លាប់លេងឲ្យក្លឹបជាច្រើននៅលីគកំពូលកម្ពុជាដូចជា ភ្នំពេញក្រោន ក្រសួងការពារជាតិ អគ្គស្នងការដ្ឋាននគរបាលជាតិ ស៊ីម៉ាក វេស្ទើនភ្នំពេញ បៀលប្រាយយូណាយធីត និងចុងក្រោយបង្អស់រដូវកាលនេះលេងឲ្យ គិរីវង់សុខសែនជ័យ៕

Loading...